ما لبثت الحكومة الأردنية أن قررت استيفاء ضريبة رسوم بدل خدمات قيمتها 5 دنانير عن كل مسافر ومركبة تغادر الأردن عن طريق البر أو البحر حتى بدأ الناس بالعويل والشكوى والتذمّر بحُرقة وكأنّهم يُسافرون كل يوم.
لنكن واقعيين ومنطقيين، قد نغضب إذا فرضت الحكومة ضريبة على الحليب أو السكّر، وقد نغضب حين تفرض الحكومة ضريبة على البنزين، وقد نغضب إذا تم فرض ضريبة على اشتراكات الإنترنت والمكالمات الخلوية، وسنغضب حتماً إذا فرضت الحكومة ضريبة بدل خدمات صرف صحّي على كل مواطن يستعمل الحمّام في بيته، كل ما سبق ذكره هي أمور ضرورية ومُلِحّة للحياة اليومية، لكن هل نغضب ونعترض إذا فرضت الحكومة مثلاً ضريبة على الكافيار؟
تماماً كما حدث عندما فرضت الحكومة رسوماً سنوية بقيمة 250 دينار على أحواض السباحة، من هي الفئة المجتمعية التي تملك برك سباحة في “قصورها”؟ المواطنون يُطالبون الحكومة باستيفاء ضرائب من الطبقات الغنية، وعندما تفعل الحكومة ذلك، يتذمّر الناس أيضاً من كثرة الضرائب وكأنّ بيوت عمّان لا تخلو جميعها من بِرك السباحة، وكأن المواطن لا يحلو له الذهاب إلى العمل صباحاً قبل أن يأخذ “غطسة” في بركته.
بالعودة إلى الـ “5 ليرات”، ما قيمة هذا المبلغ عند تاجر كثير الترحال بين سوريا والأردن مثلاً؟ وما قيمة هذه المبلغ عند أي أحد يُريد السفر إلى بيروت “لشمّ الهوا” ؟ وهو هناك سيدفع أضعاف هذا المبلغ لشراء “شيء” يشربه.
ما يُعكّرُ صفوَ حياتنا تذمُّرُنا من كل شيء.
أسامة الرمح
6th of July, 2010
معك حق أخي أسامة، لقد أصبحنا نتذمر من أي شيء ولو أنه لن يؤثر فينا، و هنالك أيضا بعض الأشخاص يتذمرون من أشياء لا تخصهم أبدا.
كلامك صح الصح يعني الضريبة كانت 8 دنانير هلأ 5 اكييد احسن….بس يعني في طرق كثير انو تنشط السياحة داخل الاردن…يعني الواحد صار يتحير فيها يطلع على مدينة العقبة ولا “بيروت”مع العلم ان المسافة ليس فيها فرق شاسع…يعني اذا بدك الناس تضل في الاردن “زبطو الاردن و بس”
@زكرياء – يتذمّرون لأنهم اعتادوا على ذلك.. للأسف.
@Bara – مبلغ 5 دنانير ما رح يخلّي اي حد يغيّر رأيه بالسفر، اللي بدّو يسافر رح يافر وما رح يفرق معه هاد المبلغ.. الهدف من هاي الضريبة مو إجبار الناس على إنهم يضلّوا في الأردن.
[...] This post was mentioned on Twitter by Qwaider Planet. Qwaider Planet said: RT @OsamaRomoh: ضريبة مغادرة 5 دنانير.. ما المشكلة؟ #مقالاتعنالأردن #مقالاتأردنية #ضريبةالمياهفيالأردن → http://bit.ly/9oqVwx [...]
مزبوط حكيك بس و الله يا أخ اسامه موالكل بيسافر عشان ينبسط يعني انا امي سوريه ف بنسافر ع سوريا زياره لأهل الولده و طول السنه بتكون عم بتحوش هدول المصاري اللي بدنا ننزل فيهم نشوف بيت جدنا و اقربائنا و صح صار الموضوع اهون من 8 دننير بس زي ما بيقولوا بحصه بتسند جره و الشعب ما بشكي من قليل بس لإنو كل حياتنا صايره دفع مصاري بدفع مصاري و شكرا إلك
يعني وافرض انو واحد متغرب بالسعودية او بدول الخليج عشان يجمعلو اكمن قرش يستر حالو فيهم تحت وقع الضرائب اللي كل يوم بتطلعلنا من جهة، بدهم يدفعوه كمان على الطلعة والفوتة،
معك حق أسامة
ما أشطرنا في التذمر على الفاضي و المليان
ربما لو تعلمنا كيف نتذمر بس على المليان لعبّرتنا الحكومة شوي أكتر
والله يا اخ اسامة ليش ما نتذمر اذا على كل شي صار في ضريبة؟؟؟
يعني ما ضل غير انهم يمزعونا ضريبة عشانا عايشين!!
والله حرام اللي بعملوا فينا
بالله عليك …….
مهو الشعب لاقي المصاري بالشارع , صح ؟؟
خير الكلام ماقل ودل
اخدو ضرايب على الأكل وكل شي بنوكلوا حكينا الله بعيين
اخدو ضرايب بفاتورة الكهرباء وخصوصا ضريبة التلفاز وحكينا أمر الله
اخدو دينار للجامعات وفي ناس ولاعمرهم دخلوها غير المصاري يلي بندفعها للجامعات وياريت دينار في ناس معهم موبايليين او اكتر حكينا هيك كتير
لمن انجيب سيارة بندفع حقها مرتين شوفوا الخليج مافي ضرايب
لا على اكل ولا على مايحزنون وبدك ما نتذمر اخ اسامة لو معك قروش هادا حكي تاني بس احنا مامعنا
و الله ياسيد اسامة شكلك غيرت اتجاهك من انتقاد الحكومة و ضرايبها بعد ما قابلت الوزير
شكله وعدك بمنصب داخل الوزارة او ممكن عمود يومي في جريته
يا اخي انا من اول متابعتي لكتابتك ما اقتنعت بطريقة شرحك للواقع الاردني
كل ما رأيته منك هو عبارة عن رؤية شخص مغترب الطفولة لم يخرج من عمان الى المحافضات الاخرى الا للأنتقاد و السخرية من الهنود الحمر الذين يعيشون خارج اسوار المدينة بأعتبار من هو من خارج عمان او الزرقاء الا بدوي اجرب حسب المنظور العام لمقالاتك السقيمة
صديقي لا أعرف هل أجندة جديدة تنفذها في الترويج للحكومة وقراراتها، هل الضرائب التي تفرض يوما بعد يوم غدت أمرا طبيعيا علينا أن نقبله، وكيف بالله عليك تقبل أن تناقش أمراً كهذا، بأي حق تأخذ الحكومة مني مالا ولو كان قرشاً واحداً وليس 5 دنانير، كلما خرجت من بلدي، وماذا تقدم الحكومة للمواطن أصلاً.
الضرائب قتلتنا وأنهكتنا ولعنت سلسفيلنا، وتأتي تقول لماذا نتذمر ؟؟ هل هذا أسامة الرمح الذي يكتب أن الحكومة سرقت مدونته وصارت تكتب باسمه، لماذا نتذمر !!! لا أكاد أصدق أنك قلت هذا الكلام، نحن ندفع ضريبة على الضريبة. ولا تقل لي انظر إلى الضرائب في العرب لأنني سأقول لك انظر إلى شوارعهم وانظر إلى مستشفياتهم المجانية وانظر إلى الحريات الموجودة
أسامة هذا المقال- مع احترامي الشديد- سقطة كبيرة في مشوارك
تعليق على جملة “ما يُعكّرُ صفوَ حياتنا تذمُّرُنا من كل شيء.”
قووول لحالك ياااخي!
أي ما في موضوع قرأته إلك في هالموقع إلا كان مش عاجبك و مش راضيك!
أي ياخي مش عاجبتك الحياة روووح إنتحر و خلّصنا!
صديقي لا أعرف هل هي أجندة جديدة تنفذها في الترويج للحكومة وقراراتها، هل الضرائب التي تفرض يوما بعد يوم غدت أمرا طبيعيا علينا أن نقبله، وكيف بالله عليك تقبل أن تناقش أمراً كهذا، بأي حق تأخذ الحكومة مني مالا ولو كان قرشاً واحداً وليس 5 دنانير، كلما خرجت من بلدي، وماذا تقدم الحكومة للمواطن أصلاً.
الضرائب قتلتنا وأنهكتنا ولعنت سلسفيلنا، وتأتي تقول لماذا نتذمر ؟؟ هل هذا أسامة الرمح الذي يكتب أم أن الحكومة سرقت مدونته وصارت تكتب باسمه، لماذا نتذمر !!! لا أكاد أصدق أنك قلت هذا الكلام، نحن ندفع ضريبة على الضريبة. ولا تقل لي انظر إلى الضرائب في الغرب لأنني سأقول لك انظر إلى شوارعهم وانظر إلى مستشفياتهم المجانية وانظر إلى الحريات الموجودة
أسامة هذا المقال- مع احترامي الشديد- سقطة كبيرة في مشوارك
يعني همة زعلانين عشان بنروح نشم الهوا على رأي الكاتب في بيروت والشام! وبنترك الاردن!
يا سيدي خلينا نترك الاردن شوي بلكي خفت الازمة شوي من شوارع عمان الي بطلت توسع لا سيارات ولا حتى ناس بتمشي على رجليهاوبعدين على قوت الاخ زبطو الاردن بس من دون ما تغلو في السعر عمرنا ما بطلع منها
انا معهم يحطو ضريبة 20 دينار واذا بدهم 50 دينار كمان بشرط لما يعملو في الاردن مسابح درجة اولى دخوليتها اقل من دينار اردني زي المسابح الموجودة في سوريا ويعملو شط في العقبة درجة اولى كمان دخوليتو 10 دولار زي الموجود في لبنان ساعتها ما بطلع من بلدي الاردن!
@واحد مش عاجبو! – جميع تعليقاتك في المدونة هي هجوم شخصي، أرجو الالتزام بموضوع المقال. إذا كان لديك ما تكتبه في سياق الموضوع فاكتب، وإلا فأنت لست مرحب بك هنا.
@محمد سلامة – عزيزي محمد سلامة، أؤكّد لك انه لا توجد أجندة جديدة، فإن عُدت إلى مقالاتي السابقة ستجد تنوُّعاً ما بين انتقاد الحكومة وانتقاد تصرفات الناس وردود أفعالهم حيال بعض القرارات.
ليست سقطة، وأرجو قراءة المقال مرة أخرى.
تحياتي لك
المسألة مسألة مبدأ يا اسامة مش انه نلاقي اعذار للحكومة انه هاي الشغلة ما بمارسها او بمتلكها غير طبقة معينة من الناس .. الاصل في الضريبة انه تتقدملك خدمة بالمقابل مش تدفع ضريبة لمجرد انه الحكومة بدها مصاري ! هالاشي مش صح و مش منطقي .. حتى بركة السباحة الي بقصر واحد غني .. يعني لانه غني لازم يدفع ضرايب اكتر ؟ ما هو هيك هيك عم يدفع ضريبة دخل و ضريبة مبيعات و ضريبة خدمات و بدفع حق المي الي بسبح فيها و حق كل اشي ولا الحكومة بتيجي تنظفله بركته ببلاش كل اخر شهر ولا اذا سكرت المجاري عنده بتروح على طول تفتحله اياها؟ خلينا منطقيين احنا بندفع ضرايب اكتر بكتير من الخدمات الي بنحصلها و هالشي غلط
كلامك صحيح 100%
انا هسه عرفت انهم رجعوها
لسا بشهر اجيت عالأردن و طلعت كانوا لاغيين ال 8 دنانير
هسه عرفت من مدونتك انه رجعوها و انا ما صارلي غير يومين بالأردن
فرصة أخلي معي أردني وانا طالع منها
بلاش من هون لـ 15 يوم تزيد الضريبة
عزيزي أسامة كما قلت وأعيد أن الحكومة تعتاش على ظهر المواطن وهو كما يعلم القاصي والداني نفطها ومصدر عيشتها، أنت لا تعرف كم من الناس تتمنى أن تخرج من نطاق حييها، وليس من البلد كي ترى شبئا جدبدا، وما المانع من سفر الناس فالغربيون يأتوننا من كل صوب وحدب، وبلادهم جنة الله في الأرض، ولكن الانسان يحب أن يرى أشياء جديدة، أسامة المواطن يتذمر لأنه لم يعد قادراً على تنشق الهواء من كثرة التفكير في الضرائب والهموم، أتعرف يا صديقي أن ابن صاحب فندق 5 نجوم في البحر الميت أحبرني أنهم وضعوا ضريبة او دخولية 50 ديناراً كي لا يروا في ردهات الفندق وشواطئه الغلابا والفقراء الكحيانين.
نحن في بلد غدت الضريبة ديدن الحكومة – وليست الفكرة فكرة 5 دنانير- الفكرة أكبر من ذلك بكثير الفكرة أن الحكومة تريد تدجيننا وأنا رأيت في مقالتك محاولة للمشاركة في هذا التدجين مع احترامي الشديد لك ولشخصك وأنا أبعد ما أكون عن الشخصنة.
بالمناسبة أسامة أنا بعرف مقالاتك جميعها، وأنا قرأتها كلها بتعليقاتها وما زلت مصراً أن في هذا المقال شيئا قد تغير ومال عن الخط الذي تسير عليه، وهو الخط الذي جعلني وجعل الكثيرين يتابعونك.
فإن مِلْتَ … مِلْنَا
مع التحية والتقدير
daf3too yalle 2odamkom w yalle warrakom w mestktrren 3ala hal 5 dannaneer !!!!!! ….. bala$ bakteen do5an w adf3hom
طيب واللي عدد افراد عيلته كبيرة
يشنق حالو؟
واللة يا اسامة انا بايد رقم 10 انت من بعد مقابلتك للوزير صرت بخط دفاع الحكومة
انت لما قابلتة ما عملت هيك عشان المواطن الغلبان انت قابلتة حتى تلفت نظرة
بدنا نسامح الحكومة بضريبة المغادرة على رأيك مش كل يوم مسافرين
ليش الضريبة على البنزين والضريبة على المكالمات الخلوية مش عالاجهزة
ليش ضريبة المبيعات على مخالفة السير وليش وووووو…….. الى اخرة
من الضرائب التي لا تفرض الا من اجل ان يدفعها المواطن الكحيان
يا زلمة بعد فترة راح نسمع انك وصلت وعلى ظهور الناس الغلابى
على فكرة الوزير عمل معك مثل ما كانت تعمل المخابرات الروسية او الفرنسية بمعاريضيها
طير خلي غيرك يهدى ويوصل زي ما انت وصلت
أعزائي، أنا هنا صاحب رأي ولست صاحب قرار. أرجو ان لا تكيلوا لي الاتهامات. ولو أنني أصبحت خط دفاع للحكومة ما كنت قد اعدتُ نشر مقالة “إقالة موسى برهومة” التي انتقد فيها الحكومة إلى حد الهجوم.
المشكلة في أن السيد أسامة عندما خالف ما يراه البعض أصبح موالياً للحكومة برأيهم ولكن لابد أن بعدنا عن الحكومة هو ما يجعل رأينا رأي شخصي بحت غير قابل للتداول والإقناع ………..
فعلاً عندما تجد المواصلات للجامعة الهاشمية لم تخفض كما قيل 50% يحتج الناس على الطبقة الغنية مطالبين بفرض ضرائب عليهم وشمت الهوا لا تشمل كل الناس …..
الموضوع ليس متعلق بالحكومة وإنما بردت الفعل للمجتمع
حلو والله إذا مو كل يوم بسافر معناتو أدفع بس بدي !!!!!
تقول يا أسامة إنوا عنا بس الواحد يسافر بكون معو Buffer خيرات الله :S
مهي السفرة عالقد يا زلمه.
أخ بس
تحياتي يا أسامة..
أن يكون الشخص معروفاً للجميع.. أو مشهوراً ولو على المستوى البسيط، يتفنن الناس في مهاجمته بأسلوب السخرية.. فلست أنت أول شخص سيتم وصفه بالحامل لهم المواطن.. ومن ثم بالمنحاز للحكومة! وبعد أشهر قليلة يا صديقي سيكتبون لك انك تستلم راتب من وزارة المالية للدفاع عن الحكومة!..وأنك بعت القضية!!! كل هذا ليس ببعيد عن مجتمعاتنا العربية العاطفية دائماً.. والتي لا تقبل مناقشة (الفكر\ة) بل تناقش الشخص!
قد لا أتفق معك في الضرائب التي تملأ الشارع الأردني حتى الثمالة، والتي أتخم المواطن الأردني فيها حتى أصبح يتمنى أن لا تكون الضريبة القادمة على الهواء! وأن تختار الحكومة أي شيء آخر! إن تذمر الشعب الأردني ليس إلا وسيلتنا الوحيدة للتنفيس.. دعهم يتذمرون.. ودع الحكومة تكثر ضرايب!
والشاطر..يقدم هجرة على استراليا!!!
ليش ما بتعرف الحكومه من اول انه سوريا اقرب من العقبه وانه الشعب كله رح يتجه لسوريا في حال عدم دفع رسوم على الحدود السوريه الاردنيه؟
صار الوضع انه كثير عيب نروح على سوريا نجيب اغراض بيتنا على مستوى لحوم ومعلبات
من محاسن الصدف أن الكاتب عريب الرنتاوي تناول الموضوع ذاته في مقاله في صحيفة الدستور صباح اليوم، لعل من المفيد الاطلاع على وجهة نظر أخرى في المسألة الأخرى.
المقال تجدونه على موقع الدستور، الرابط
http://tinyurl.com/departuretax
الضريبة هي 5 دنانير للمسافر و 8 دنانير للمركبة، أي أنك تدفع 13 دينار بالمجموع إن سافرت وحدك.
المستنكر في الأمر هو أن قرار “إلغاء ضريبة المغادرة والدخول” إلى سوريا الذي احتفى به مسؤولو الحكومة كثيرًا قبل شهرين لم يعد له قيمة بهذه الطريقة، والوعد من وزير المالية بأن “لا ضرائب جديدة قبل نهاية العام” لم يعد له قيمة أيضًا، ولعل هذا وحده يكفي لانتقاد القرار حتى قبل أن ننظر في محتواه.
يا سيد اسامه نعم نعتز باننا اردنيون ونتفاخر امام كل العالم ولكن قد تعب المواطن الاردني من كثر دفع الظرائب ودخله متدني الى حد ما لا يقدر ان يغادر للسياحة الى العقبة والنزول بالفنادق الغالية والمعاملة الغير لائقة للسائح الاردني كما لامست بنفسي وايضا انا مواطن اردني والحمد لله وبكل الفخر والاعتزاز انا متزوج من سورية وعندي 8 اولاد وانا ووالدتهم اصبحنا 10 اشخاص وانا دخلي محدود لا اقدر ان ادفع كل هذه الضريبة التي فرضت على المواطن البسيط مثلنا ولو ان السياحة عندنا مناسبة ماديالما ذهبنا الى خارج وطننا الحبيب على قلب كل مواطن اردني .
@أسامة الرمح –
لكل جواد كبوة ،،، وهنا انت المخطئ يا أسامة ،،، الرجل علق على فقرة في المقال ،، لا هجوم شخصي ولا شي ،،، أنا رأيي أنه التعليق كان موضوعي ،،، أرجو أن تتحمل رأيي
فلنتق الله ف ما تخط يدينا ولنعلم اننا محاسبون
نحن لا نتذمر من كل شئ ، بل كل شئ يتذمر علينا ويحزن لاجلنا.. ضرائب في ضرائب
وغيرها الكثير ,,.. ولن اكتب كثيرا او اعلق . حتى المتنفس الوحيد سوريا ارادو ان يغلقوه تخيل انك تريد الذها الى البحر الميت .. انظر كم ستدفع على مكان لا يوجد به ادنى خدمات وان اردت ان تدخل فندق خمس نجوم انت بحاجة الى راتب شهرين لتستجم ليوم واحد
وانا مع تعليق رقم 13( محمد سلامة ) 100%
يعني تحطيم الشعب بلضرائب المختلفه ماذا استفدنا نحن من الصلح مع اسرائيل سوى تفنن الضرائب وخنقنا برا وبحرا وجوا من قبل ابو حمور
السلام عليكم
انا لا اعرف كيف دخلت هنا اصلا المهم / بدي احكي من الاخر
المطاعم لما بدك تاكل صحب حمص صار بنص دينار ما بيجيبوا همهم
السيارات واو بتقدر تحكي ببلاش مقارنة بجميع دول العالم ( مصخرة )
الايجارات و كانة كل انسان عنده شقة او بيت للايجار بدو يعيش اولاد اولادة من الايجار الشهري وكانه مأجر حي كامل .
البنزين دايما معوم و عوم جيوبنا معه
الكهرباء يا سلام
المي كل شهر فاتورة
المواصلات جدا رخيصة
الاكل يا بلاش
الطشة كمان ببلاش – الحمة الاردنية دخولها دينارين و حرام ندخلها من قد ما هي نظيفة
الدخان من كثر الهم صار هم كمان من سعرة مع انه مش ضروري
سمعت عند ترخيص السيارات في ضريبة جديدة اسمها استعمال طرق خارجية مش بكفي ضرايب
بكفي ولا ما بكفي
والله لازم نعيس بدولة ثانية علشان ما ندفع ضرايب ولا شو رايك
خلينا نطلع لسوريا ببلاش مش بكفي السايق كمان ماخذ 10 دنانير اجرة
يا اخي حرام
و سلامتك سيدي
@أسامة الرمح –
يا اخ اسامة قرات المقال مليون مرة وما شفت فيه الا انتقاد للمواطن الغلبان اللي مش راضي عن الضريبة الجديدة القديمة .. طبعا الحكومة لما بغت ضريبة المغادرة على الحدود البرية رفعتها على المسافرين جوا .. بس الان رجعتها على المسافرين برا وبحرا وعملت حالها ناسية المسافرين جوا وانها لازم تخفض الضريبة اللي رفعتها عليهم لانو ضريبة البر والبحر رجعت مرة تانية.
بس يا اخ اسامة اذا مصريك كتار مش كل الناس زيك
وبدل ما تنتقد الناس روح شوف فنادق العقبة ومسابحها
واخيرا ياريت تراجع كتاباتك مرة اخرى وخاصة هالمقال الغريب لانو فيه تشكيك في الناس اللي رايحين للشام يعني شوف هالمقطع “وهو هناك سيدفع أضعاف هذا المبلغ لشراء “شيء” يشربه.” شو قصدك يعني وبعدين ليش التعميم هيك التعميم هوة اسوء شي في مدونتك.
يعني اخي اسامه أنا مش فاهمك في هذه!!! وكأن المواطن الاردني يعيش في حاله رفاهيه لا مثيل لها
ومن ثم يتذمر لأتفه الاسباب كما تريد انت الان ان تصفه !!!؟؟؟؟.
يا اخوان انما اكلت يوم أكل الثور الأسود يعني المواطن الاردني مقموع ومثقل كاهله بكل تلك الضرائب والمعيشه
الضنك يا عالم اكثر من 50% من الاردنين تحت خط الفقر عطلت عقولهم بالبحث عن لقمه الخبز وانت تقول لما التذمر ؟؟؟؟
هذة بالضبط سياسه ( وانا مالي ) التي نجحت الحكومات الاردنيه في ارضاعنا اياها مع حليب امهاتنا. وانا مالي هو أنا بسافر!!!
لما رفعت الحكومه سعر المحروقات عملت زيك قلت يالله وانا مالي ما أنا ماعندي سياره بس لما رحت اشتري خبز قالوا سعره ارتفع 10 قروش قلت وااال ليش قالوا صبح الخير الديزل غلي, جينا نركب في السرفيس قالوا الاجره ارتفعت 15 قرش ولكوا ليش؟؟؟
قالوا البنزين ولع, كيلو البندوره صار 2.50 دينار ليش يا عالم قالوا ايه يا رجل النقل زاد, طلعت أنا خسران من جيبتي هديك الحسبه
مع انه يا عالم والله ماعندي سياره !!!!!!!!!!!
فمنذ ذلك الحين تغيرت سياستي الى ( أنا الي حتى لو ماالي )
ولا يلدغ المؤمن من جحر مرتين