نصائح عند ركوب “باص مواصلات” في الأردن
نصائح عند ركوب “باص مواصلات” في الأردن
كتير منا بعرف باص المواصلات، هاد الصغير اللي بكون مكتوب عليه (عمّان-الجاردنز)، أو (البقعة-دوار عبدون)، سويلح سويلح سويلح، بس الأكتر همه اللي كان إلهم تاريخ عريق مع هاي الباصات بس بحكيلك: (عمري ما ركبته). ركبته ولا عنَّك ما ركبته، خليني احكيلك شوية نصائح قبل ما تركبه:
حاول إنو يكون معك قد مقدار الأجرة بالزبط، لإنو لو كان معك أقل، رح تاكل كف، ولو ما كان معك “فراطة”، قدامك خيارين، يا تاكل كف يا تسامحه بالباقي، انا لو مكانك بسامحه وبسامح أبوه كمان، أما لو كنتي بنت، فش داعي يكون معك فلوس أصلاً.
اذا ركبت الباص وما لقيت مكان فاضي إلا جمب أبو شفرة، انزل من الباص بسرعة وخد تكسي اشرفلك. (لمعرفة ابو شفرة راجع موسوعة الجويدة للمجرمين والناس اللي بِخَوفوا).
خليك هااادي طول ما انتا في الباص، واوعى تتقاتل مع كنترول الباص لو شو ما كان السبب، لإنو لو صار هيك، اعرف انك رح تخسر اعز الاشياء بحياتك، الكنترول رح يضرب، وكل اللي في الباص رح يضربوا، أما الأخ سايق الباص، رح يدعس بريك ويوقف الباص وييجي عليك وينزل فيك خبط بعصايته الحديد اللي ما بتفارقه وين ما يروح تحسُّباً لأي طارئ.
اذا وانتا في الباص اجت بنت، وما لقت مكان تقعد فيه، يا بتقوم تقعدها محلك يا ما بتقوم، في الحالة الأولى رح تصير محط أنظار الجميع، وأبو شفرة واحد منهم، وبما إنو ابو شفرة واحد منهم، فما بنصحك إنك تكون بهيك موقف، أما في الحالة التانية، رح ييجي كنترول الباص ويحكيلك: قووووم، طبعا انتا رح تقوم زي الارنب، لإنك زلمة.
لا تتوقع انك تركب باص مو حاطط شريط لأبو وديع، لإنو أبو وديييع حبيب الديييونجية، وزي ما انتو عارفين، فالديونجية هي أحد أهم الشروط الواجب توافرها في سايق الباص، وتحية لوزارة الباصات، وبما انو عم نحكي عن الاغاني فخليني اجيب سيرة المسكين المسخم مصطفى كامل.. هاد المتعوس كان بدو يصير مغني راح نزل اغنية حلوة اسمها “رحلة عمري”، هوه للأسف ما كان عارف انو هاي الاغنية رح تنتشر في رغدان والعبدلي ومجمع الزرقا القديم، هوه يا جماعة ما كان قصده يصير مغني الدواوين والمجمعات.. مسكين.
لا تحاول أبدا أبداً إنك تعاكس أي بنت بتركب الباص، لإنو يا ابني، كل اللي في الباص رح يصيروا ولاد عمها واخوانها وانتا يعني مش وجه بهدلة، أما الأخ السايق هوه نفسه أبو عصاية، رح ينزل من الباص و …. (حُذِفَ لأسباب تتعلق بالجودة).
اذا كنت بتستنى الباص عند نفق الجامعة وشفت الباص جاي من بعيد والكنترول مطلع راسه من الباب وبحكي (بسرعة بسرعة)، بنصحك لا تركب معه، لإنو رح يمسكك من بلوزتك ويرميك في الباص، وأول ما تحط رِجل وحدة جوا الباص، الأخ السايق هوه نفسه رح يدعس بنزين عالآخر، وانتا يا رح توقع من الباص وتتكسر، يا رح توقع جوا الباص بحضن ابو شفرة.
أسامة الرمح
July, 2007
Rss
Linkedin
Friendfeed
Youtube
Twitter
Facebook
Deviantart
February 19th, 2008 at 12:56 pm
هههههههههههههههههههه بس شو الحل لها المصايب كلها؟؟
February 19th, 2008 at 3:25 pm
سوما شكراً على الموضوع حبيبي
كثير حلو
بس بنصحك ما تحكي عن ابو شفرة ثاني مرة لأنو راه يطلعلك بحلمك
هههههههههههههههه
ابقى سلملي على ابو شفرة
February 20th, 2008 at 5:17 pm
ما توقعت لاقي ابو شفرة كمان بالباص،مش بكفي المستشفيات العمومية قاعد هنيك،على العموم انا على ها الحال،باخدها كعيبي احسن
February 20th, 2008 at 11:53 pm
يسلم تمك….احلى اشي (ابو شفرة).
وكل اللي في الباص بصيروا قرايبها مش طبيعي الشهامة:)
February 22nd, 2008 at 6:16 pm
هههههههههههههههههههههه
يااااااااااااااه انو بجد مغامرات بركبة البااااص لووووووووول طلعت خبره يا فتى..(غمزه)
February 22nd, 2008 at 11:21 pm
هههههههههههههههههه
قال حذف لاسباب تتعلق بالجودة
ولا اشي…
حكيك صح100% يا صديقي
February 23rd, 2008 at 10:24 pm
عن جد رهييييييييييب يا اسامة
هاد الاسلوب التهكمي اللاذع جدا رائع
اعجبي : شخصية ابو شفرة , و حديدة شوفير الباص , والكنترول .
February 25th, 2008 at 7:14 pm
hhhhhhhhhhhhhhhhhhhhhhhhhhhhhhhhhhhhh
kteeeeeeeeeeer funny !!!
March 7th, 2008 at 11:29 am
حاول إنو يكون معك قد مقدار الأجرة بالزبط، لإنو لو كان معك أقل، رح تاكل كف، ولو ما كان معك “فراطة”، قدامك خيارين، يا تاكل كف يا تسامحه بالباقي، انا لو مكانك بسامحه وبسامح أبوه كمان، أما لو كنتي بنت، فش داعي يكون معك فلوس أصلاً.
عاشت ايديك اخ اسامة على هذا الموضوع الرائع
وفعلاا انت تعرف معانتنا بلباصات مال عمان
June 4th, 2008 at 10:24 pm
انو الزناخة بكل الموضوع ……… من فترة رحت على السلط مشوار اضطراااااااااااااااري … فما كان من الكنترول الا انو بضل ينادي “”"”" محكمة …..محكمة…محكمة … وبكمل مين نازل على المحكمة … وصلنا المحكمة با اخوان مييييييين ينزل هون “”" ما حد نازل على المحكمة “”" وكأنو احنا ما بنسمع او هو مستألع ……!!!!!!!!!!!!!!1 :angry:
June 4th, 2008 at 10:31 pm
تتقاتل مع كنترول الباص لو شو ما كان السبب، لإنو لو صار هيك، اعرف انك رح تخسر اعز الاشياء بحياتك، الكنترول رح يضرب، وكل اللي في الباص رح يضربوا، أما الأخ سايق الباص، رح يدعس بريك ويوقف الباص وييجي عليك وينزل فيك خبط بعصايته الحديد
ya 25wan ana sha59ean 3amel 6oshe ma3 control ba9 .. l2nno mesh 3agbo shekle l2nne shab stylish w shway sha3ry 3′areeb .. bas masa7t be karamto al share3 .. fe3lan 2nno 23′labhom fe2a danee2a men al mogtama3 .. w shokran ..
June 4th, 2008 at 11:31 pm
بالفعل كل الحكيتو مزبوط بس انسيت تحكي عن المغنيين الخلايجه القدامه
ابو شفره هاد ياخوفي عاملك اشي عن جد ههههههههه :wub:
June 4th, 2008 at 11:50 pm
عنجد الباصات بتعل و بتخلي الواحد يزهق حالو
بس بدي احكي اشي ما انكتب و هاد اشي كثير مهم انو عن الركاب لأنو في نوعين من الراكبين الموزعجين النوع الاول يلي بقعد على الكرسي و معاه صاحبو بعيد عنو 100 كرسي و بيصيرو يغلطو و يحطو اغاني و يطلعو صوتهم النوري
و النوع الثاني يلي بيكونو ساكتين بس بزعجوك في ريحتهوم يلي مثل العمى صار للواحد من العيد تبع رمضان سنة 2002 مش متحمم وهاد النوع بيجي بقعد جمبك لو كل الباص فاضي
June 4th, 2008 at 11:54 pm
احلا شي شخصية ابو شفره
بس انتا ناسي تضيف انو لازم توخد معك حزام امان متنقل كل ما تركب بالباص لانو بصير رالي ابو رمانه عالطريق وكمان فلتر للتنفس من ريحة الديزل الطالعة من الباص
June 5th, 2008 at 12:08 am
besara7a fi mobal3′a kteeeer fiha y3ni 7awl enha tkon wak3eh aktar mn heeek
m3 e7trami elak
bs ymkn heek ana shoftha
:blush: :heart:
June 5th, 2008 at 12:40 am
very very very nice comment
June 5th, 2008 at 12:42 am
:alien: :alien: :alien: :alien:
هذا زي ابو شفرة
هههههههههههههههههههههههههه
June 5th, 2008 at 9:03 am
Nice One
June 5th, 2008 at 10:06 am
looooooooooooooooool nice manooo
June 5th, 2008 at 10:12 am
وياااااا حبيبي لما ييجي بدو يزبط بنت بالباص ..
بضل مبحلق فيها وبمد ايدو على المحفظة وبطلع الكرت السحري ( الي هو رقمو )
وبصير يطلع فيها ويغمز فيها ويأشرلها بالكرت السحري تقول فش حد بالباص شايفو
June 5th, 2008 at 11:17 am
للأسف يا أسامه اللي خلاني دواوين و من الآخر الناس بتخاف تركب معي بنفس الباص تاريخ حياتي….
وأنا صغير (عمري من سنه ل 10 سنين) بطلع بالباص عشان أقضي مشاوير
لما كبرت (من 10 ل 18 سنه) اشتغلت كنترول باص عمان الزرقا-الدواوين وبالعكس
بعد هيك (من 18 ل 27 سنه) اخذت الرخصة و اشتغلت سايق على نفس الباص
طبعا نص الفتره قضيتها يا إما مطلوب أو محبوس وهالإشي خلاني أصير على وضعي الحالي
بس بيني و بينك بشرفي، و وحيات أبو موس والجنط، و رحمة كل الدواوين اصحابي انها الباصات أحلى حياة، فيها تعرفت على كل ديونجية الأردن… و روح يا مجروح
سلاااااااااااااااام
June 5th, 2008 at 6:44 pm
عاشت ايدك اخ اسامة بس انت نسيت شغلة وهي كاسة الكهوة تبع الكونترول اللي بتكب يا عل ارضية الباص ياعلى بنطلونك وانت طالع الباص
June 5th, 2008 at 9:44 pm
ههههههههههههههههههههههههه حلوه حلوه والله يا حج اسامه ….. وتحياتنا لشفيرية الباصات كلهم ……. ومني الك احلى بوسه ..
بس كلو لعيون ابو شفرة اهم اشي يكون راضي
June 6th, 2008 at 12:08 am
:alien: كنترووووووووول
June 6th, 2008 at 1:07 am
والله يا اسامه انو عمل رائع
بس انا بحب ازيد على معلوملتك شوي
انك نسيت السيد الكبير حسن الاسمر
و الموسيقار حماده هلال
ههههههههههههههههههههههه :cheerful:
July 21st, 2008 at 11:31 am
تموضوع جميل و واقعي…..لكن في جملة تكررت ” بضربك كف “…. انا بحس انو هاظ اشب مبالغ فيه و تكرارها كان لاضافة شوية “اكشن”…بس فيش منو هاظ الحكي……بس على اي حال…موضوع جميل…
July 21st, 2008 at 6:01 pm
كل شي مكتوب مزبوط بس انسيت شلة السائق اللي بتكون على جنبه والكنترول والسيجاره بثمه والجل على شعره وكيف لما تدخل بنت حلوه وبالقوه بقوم الراكب من محله وبقعدها والاحترامات وعندنا بالقرى مع الطريق بنزل الراكب وبشتري خبز وبشتري واحد ثاني جاج وبجي الثالث عمدا وبنزل بشتري دخان وناس بتركب خرفان محل الانسان وكله عمدا بلاخرين وهي قصص حقيقيه
July 23rd, 2008 at 9:55 pm
ع راااسي معلم و قزدرة كمان صارلي ساعة بقراء سواليفك و صارو عيوني يحرقو ف قررت اكتبلك كومنت (تعليق) و اطلع بس بدي احط هاد السايت عل فيفاريت (المواقع المفضلة) و بس يبطلو عيوني يحرقو برجع صراحة و دون زعل انا جديد عرفت عنك يعني من ساعة زمن عن طريق الفيس بووك هاد طلعت مشهور و احسن مقالة و ناس بنتقدوك و انا مش داري بس ليش الحكي حقك الشرعي كل سواليفك حلوة تردش ع حدا و كيييب حونج (استمر)
تحياتي
July 9th, 2009 at 10:33 am
هههههههههههههههه مشكووور اخي اسامة
July 29th, 2009 at 12:04 pm
أنا معاك في كل إشي بس شكلك نسيت شغلة إنوا لا زم تنتبه قبل ماتقعد على الكرسي تفقدو بلاش يكون عليه علكة أو اي إشي أخر
August 26th, 2009 at 6:17 pm
الناس بتتغير بعد مرور السنين
Warning: parse_url(http://???) [function.parse-url]: Unable to parse URL in /home/stisl/public_html/wp-content/plugins/seo-super-comments/seo-super-comments.php on line 117
nada Says:
September 2nd, 2009 at 12:34 am
والله يا اسامة انك رائع يعني وصف دقيق للواقع المرير للموضوع الباصات و الكونترولية و مصطفى كامل فعلاااااااا المطرب المفضل للسواقيين
انت روعة؟؟؟؟؟؟؟؟؟؟؟
September 10th, 2009 at 12:22 am
kteeer 7lo….
October 12th, 2009 at 4:20 pm
عن جد موتتني من الضحك
هههههههههههههههههههه
اسلوب رائع في التهكم والكوميديا الساخرة
موفق ان شاء الله
وبعدين ازا كان الراكب بنت ما في داعي للفلوس هههههههههه
تحياتي
October 16th, 2009 at 8:14 pm
والله التصرفات صحيح بس ما في حدى برضى ع حالو يصير فيه هيك لا ابو شفرة ولا ابو عريضة علي الضمان بكب هالكاسة بنص صباحو واذا البنت محترمة ما بقعدها كيف لو مش محترمة حالها وطالعة بباص فل بعدين هظول كلهم شرذمة مقطعين فاهمين قصدي يعني
October 22nd, 2009 at 2:48 pm
هههههههههههههههههههههههههههههه
عنجد زوء اكثير وقمة في الاتقان في سرد
وكلام صحيح بس لحمدلله بطل في كنترولية في عمان الزرقا ههههه
October 27th, 2009 at 1:42 pm
ااااااااااااخ على باصات عمان رعب وخوف ومواقف بضحك وبحس اني بملاهي لانو بكون طاير حاسس حالو الشفير انو خفيف زي العصفور ولا كنو في ناس رح تموت من الخوف ويلا صوت اغاني ودقي يا مزيكة مرات بكون نفسي اقوم ادبك قد ما الجو شغل صالات والي بموتني اكتر الكنترول يا ويلي شو انو فهيم اوعى حدا يغلط معو وهو بفهم بكل شي وبدو ينزل الركاب زي ما هو بدو وبضل يعمل حركات هبلة وينط من الباب لعند الشفير ويتامر على الشفير كيف يسوق ويلا امشي فش حدا مع انو بكون الشارع مليان
اخخخخخخخخخخخ انا لو بدي احكي عنهم بدي ضفحة كاملة لاني كل يوم بشوف هاي المعانة بس يلا بتعدي شو بدنا نعمل مو شي جديد
December 31st, 2009 at 1:06 am
لا أظن أحداً في الأردن ليس لديه تجربة أو نهفة مع كنتروول باص أو سائق باص ، لأنهم سبحان الله والتعميم ربما ينطبق على هؤلاء الفئة لكن يوجد فئة منهم ملتزمة و المهنة لا تحرفهم عن الخلق والطباع الحسنة
يمكن أنا من الناس اللي خضت ربما معارك طاحنة مع سواقين وكنترولية ومرات كثيرة أكتفي بالمشادات الكلامية
خاصة خط وادي السير الجامعة الاردنية
يا حبيبي على هيك كنترولية وسواقين
لازم كل يوم تعمل معهم هوشه حتى تصل عالجامعة
الواحد بصراحة قرف الباصات من ورا التصرفات اللي بتصير كل يوم
تعلمت كمان كل واحد يحترمهم بيضيع خقه لازم تكون قاعدلهم مقعد
وهيك مزبطه بدها هيك ختم
وتحياتي يا أسامة
January 1st, 2010 at 12:32 am
الاسلوب فكاهي في الطرح
بس حاس انه الموضوع مش لهالدرجه وصل
اذا كنت قد حالك ما رح يصير الك شي من اللي بتحكيه
اما اذا كنت مغنوج هاي شغله تانيه
March 5th, 2010 at 11:45 pm
امممم حلو ابو شفرة جاي عبالي اشوفه