يوميات بني آدم 10 – قمة الأرق

يوميات بني آدم 10 – قمة الأرق

بتكون الدنيا حر بتنام بتصحى بتلاقيها عم بتمطّر، وبعدين مع هالشغلة؟ بتنام مرة تانية بتصحى بتلاقي الدنيا نار، مش مشكلة عادي، إجى الصيف مع إنو غريب شوي هاي السنة بس المهم إنو إجى أخيراً مشان نعرف راسنا من رجلينا.

أنا شخصياً مافي بيني وبين الصيف أي عداوة، لحد أول مبارح، اتزكرت إنو في تار بايت بيني وبينه.

كنت نايم بالليل بأمان الله، تعبان من الشغل وهلكان وبس بدي أرتاح، حطيت حالي على الفرشة اللي حاططها على الأرض ونمت. لا تخافوا عندي تخت بس بحب أنام على فرشة دايركت.. المهم هديك الليلة نمت 6 ساعات وصحيت خلالهم تقريباً 50 مرة بسبب “البعوض”، هاد اللي ما كنت عامل حسابه.. إنو الصيف بيجي وبجيب معه البعوض، وهاتلك يا قرص، كل شوي بعوضة، كل شوي بعوضة، ما خلّوا قطرة دم بجسمي إلا وشربوها، شكلهم بعوض من ذوات الدخل المحدود أو من الطبقة المتدنّية.

يمكن أحد أكتر الأشياء اللي بكرهها إنو حدا يصحّيني من النوم لما أكون تعبان، بس البعوض ما استوعب هاد الشي، قمت من النوم معصّب وصرت أتحلّف للبعوض، كل شوي أضرب إيدي في الهوا وأوقع على الأرض، أقوم أحاول أضرب البعوضة أوقع على الأرض، رجعت نمت رجع البعوض استلمني، تقريباً كرهت حالي.. وطول الليل على هالمنوال.

تاني يوم رحت جبت هاد الجهاز اللي بنحط فيه اشي لونه أزرق وبشبكه في الكهربا وبطلّع ريحة حلوة بتقتل البعوض، تأكدت قبل ما أنام إنو الغرفة تشبّعت بريحة هاد الإشي وتأكدت إنو الشباك مسكّر وإنو مافي إشي بطير في الغرفة، ورحت نمت برضو على الفرشة وبرضو عندي تخت بس بحب أنام على فرشة دايركت..

وبرضو كنت ميت تعب وبس بدي انام، وبرضو نمت 6 ساعات وصحيت بدل الـ 50 مرة 100 مرة مستغرب ليه ما قرصني البعوض !!

فعلاً.. هاد هوّه قمّة الأرق.

أسامة الرمح

21st of May, 2009